სისხლის სამართლის საპროცესო კოდექსის 83-ე მუხლი ადგენს მხარეთა შორის მტკიცებულების გაცვლის საპროცესო წესს.
მტკიცებულებათა შესახებ ინფორმაციის გაცვლის მნიშვნელობა განპირობებულია იმით, რომ ის ემსახურება მხარეთა თანასწორობის უზრუნველყოფას. მისი ერთ-ერთი დანიშნულებაა, ის რომ შესაძლებლობას აძლევს მხარეებს კარგად მოამზადონ საკუთარი პოზიცია. ასევე ემსახურება სასამართლო პროცესის ეფექტურობას, ვინაიდან, თუ მხარემ ინფორმაცია რომელიმე კონკრეტული მტკიცებულების შესახებ შეიტყო მეორე მხარისაგან სასამართლო პროცესის მიმდინარეობისას, ეს გამოიწვევდა პროცესის გადადებას და გაჭიანურებას: სასამართლო ამ შემთხვევაში ვალდებულია მეორე მხარეს მისცეს საშუალება, გაეცნოს წარმოდგენილ მტკიცებულებას და მოამზადოს საკუთარი პოზიცია . მტკიცებულების გაცვლა ასევე შესაძლებელს ხდის მხარეებს შორის შეთანხმებას კონკრეტული მტკიცებულების თაობაზე, რაც გაამარტივებს სასამართლო განხილვას.
მტკიცებულების ცნებიდან გამომდინარე, “გასაცვლელი ინფორმაცია” ეხება მხოლოდ ისეთ ინფორმაციას, რომელიც მტკიცებულების სახით შესაძლებელია წარდგენილი იქნეს სასამართლოში. ეს ინფორმაცია შეიძლება წარდგენილი იქნეს როგორც წინასასამართლო სტადიაზე, ისე არსებითი განხილვის დროსაც, ვინაიდან ინფორმაცია მტკიცებულების სტატუსს იძენს სასამართლოში წარდგენისთანავე – თუნდაც ის გამოვლინდა არსებითი განხილვის სტადიაზე.
83-ე მუხლის პირველი ნაწილის თანახმად:
“სისხლის სამართლის პროცესის ნებისმიერ სტადიაზე დაცვის მხარის მოთხოვნა ბრალდების მხარის იმ ინფორმაციის გაცნობის თაობაზე, რომლის მტკიცებულებად სასამართლოში წარდგენასაც ბრალდების მხარე აპირებს, დაუყოვნებლივ უნდა დაკმაყოფილდეს. ბრალდების მხარე ასევე ვალდებულია ამ ნაწილით გათვალისწინებულ შემთხვევაში დაცვის მხარეს გადასცეს მის ხელთ არსებული გამამართლებელი მტკიცებულებები.”